“Дапаможнік раварыста 2.0” на Грушаўцы

 

 

Праз дарогу ад асноўных падзеяў фэстэвалю размесціўся невялічкі блакітны навес, пад якім ладзілася прэзентацыя “Дапаможніка”. А другой гадзіне дня ўсе зацікаўленыя раварысты і не толькі сабраліся там, каб даведацца аб мэтах і навінах праекта і першымі атрымаць запаветную кніжку.

Мерапрыемства складалася з трох частак: аповед аб праекце, распаўсюд толькі надрукаваных брашураў і гутарка з аўдыторыяй.

 

Расповед аб “Дапаможніку” доўжыўся блізу 15 хвілін, затое камунікацыя са слухачамі апасля цягнулася куды дольш: нехта прапаноўваў сваю дапамогу, хтосьці ацэньваў карысць брашуры і ўсур’ёз задумаўся набыць ровар. 

 

 

“Гэта файна, што роварны рух у Мінску развіваецца так актыўна”, - падзяліўся сваім уражаннем адзін з прысутных на сустрэчы раварыстаў. 

І сапраўды, ад прэзентацыі першай версіі “Дапаможніка раварыста” мінула менш за год, і за гэты кароткі прамежак часу сітуацыя ў горадзе заўважна змянілася. Тых, хто абірае ровар як сродак перасоўвання, становіцца ўсё болей, а роварная сцежка ў выходны дзень па трафіку можа спакойна спаборнічаць з праспектам.

 

 

 

Заўвага ад прамоўцы Сяргея Яўменава:
“Агулам прэзентацыя “Дапаможніка 2.0” прайшла паспяхова. Былі як тыя, хто прыехаў адмыслова на нашую імпрэзу, так і наведвальнікі “Фэсту на Грушаўцы”. Парадавалі атрыманыя прапановы на наступную супрацу і ўдзел у праекце. Мы адкрытыя да прапановаў і далучэнні кожнага зацікаўленага ў змене правілаў”.

 

 

Падноўленая брашура ўтрымлівае ПДР, якія тычацца раварыстаў, парады па ўтрыманні, даглядзе і транспартыроўцы, адрэсы майстэрняў і іншую карысную інфармацыю. На вікі праекта можна знайсці электронную версію “Дапаможніка” і, калі ёсць патрэба, дадаць яе актуальнымі дадзенымі і ўласнымі роварнымі лайф-хакамі.

 

 

• Гомель - 17 траўня;
• Брэст - 18 траўня;
• Магілёў - 24 траўня;
• Гродна - 1 чэрвеня.